الليل ملاح
تايه سواح
لا بيوصل شط
ولا بيرتاح
****
الليل مشحون
اسرار وشجون
والم ونغم
وكاسات ونايات
ودموع واهات
وعبر وحكم
ومشيت فى الليل خجلان مكسوف
اكمن الليل عريان مكشوف
افراح الناس
وجراح الناس
على صدر الليل عناقيد وصفوف
وعيون الليل والضلمه جبال
فاردين على وش السما غربال
الماظ مبدور
فى كاسات بنور
يرسم للنور على الارض خيال
ويشق سكون الكون ارغول
ونغم فنان
ثاير ..مخبول
وعليل على فرشه بيتقلب
ويحايل جرحه المدارى
ويقول
يا طبيب قلبك طيب
اسمعنى هقولك اسرارى
لو شلت الشكوى على لسانى
ورميتها قريب
ماتكونش جراحى مالمانى
ابداً يا طبيب
منا دقت الجرح وخدت عليه
يسيقنى المر
وبرضه اسقيه من بحر الصبر
اللى فى قلبى
حتقولى بتشكى اومال من ايه؟؟
ولا من اوجاع
ولا شوق لمتاع
دنا عمرى ان ضاع
مش حبكى عليه
ابداً يا طبيب
يا طبيب دنا جرحى ملوعنى
وساقينى الحنضل من كاس
والنار فى ضلوعى بتلسعنى
وانا لسا صغار
والعيا قاسى
ولا عمر الليل مره سمعنى
علَّيت الاه على انفاسى
ابداً يا طبيب
موضوع: فى الليل لاحمد فؤاد نجم من ديوان اغنيات الحب والحياه 
الإثنين 14 ديسمبر 2009 - 19:52
