إلا فلسطين / فؤاد حداد

google_protectAndRun("ads_core.google_render_ad", google_handleError, google_render_ad); ولا في قلبي ولا عينيه
إلا فلسطين
وأنا العطشان ماليش ميه
إلا فلسطين
ولا تشيل أرض رجليه
وتنقل خطواتى الجايه
إلا فلسطين
*

عشان الأرض تتطهر
ويرجع لي الشجر والدار
على طول الحدود أسهر
ليالي ما تفارقش نهار
أنا الواقف في خط النار
وانا اللي حلفت بالأزهر
وبالأقصى وبأميه
ولا في قلبي ولا عينيه
إلا فلسطين
*

على طول الحدود واقف
هنا وقفة صلاح الدين
وانا بملايين عرب زاحف
وباليوم اللي ظهره سنين
وانا باسم الشرف والدين
وانا باسم السلام حالف
في كل رصاصة أغنيه
ولا في قلبي ولا عينيه
إلا فلسطين
*

سلاح الثوره متدرب
على الثورة لابد يثور
يخلي الغرب يتغرب
يخلي الشرق زايد نور
وانا بأمر السلام أضرب
وانا بأمر السلام منصور
دي كل رصاصه بتقرب
ولادي من حواليه
ولا في قلبي ولا عينيه
إلا فلسطين
وانا العطشان ماليش ميه
إلا فلسطين
ولا تشيل أرض رجليه
وتنقل خطوتي الجايه
إلا فلسطين


__________________

العفو وشكرا على المرور

جزاكي الله كل خير اختي

شكرا على مرورك اختى