مصر تتحدث عن نفسها/شعر أسامه القهوجى

أنا أمك وبكتبلك
ودمع الحبر يا غزه
مداد أحمر على الخدين
منين البدر يا ننى
-ال راح منى- أوصلك
ضياؤه منين
منين الشمس يابنتى
- ال من بطنى- أجبهالك
ولو شيله على الكفين
منين الرضعه يا كبدى
أوصلك وفى سده مغريه
على الضرعين
وعتريسنا ال ورثينه
بقضى خوفنا على بدنى
مضى عقدين
يبيع الرضعه وولاده
بميت بوسه على حكه
على رقصه على حضنين
وعقد يتن ع الكرسى
بسب الدين وبالكرباج
وبالكوسه وبالزنازين
دنا أمك وبكتبلك تسمحينى
ومين غيرك يسامحنى?
يا نور العين

أنا أمك وبكتبلك تسمحينى
يا روح روحى
يا روح روحنا
يا روح الـــدار
تسمحينى دنا وحـــــــــــدى
مليش غيرك فى حتتنا
-ال كرهانى- ضنا أو جار
تسمحينى على الخســـــــه
ال لبساهاعلى جسمى
بغيرها غيار فى غيار
قميص شرقى
بقمــــــــــــــاش غربى
وتفصيله على مكنه
مصنعها عدو جـــــــزار
تسمحينى على بيعى
لشرف غزه ف مزاد علنى
على عينى مسا ونهار
وكل ال بيعه متقرب
موطيه عشان ترسى
على تاجر من التجار
ققوم وقفه مطاطيه
يقوم واحـــد مقعدنى
بكام نغزه وألــــف دولار
تسمحينى على قلبى
ال شاف قلبك فى ناب كلبك
ورق ناشف ف وسط النار
وكل الولعه متشعلل
بدل ما أرش من نيلى
أروح راشه حطب وسولار
تسمحينى على عيلة
زعيم خاين مهش غاويه
تكون طاهره من الأطهار
وسمحا لها إن تتنطط
على ظهرى وركبانى
وانا عامله كإنه هزار
تسمحينى على النخبه
ال طول يومها شريط سافف
فى تسجيله عن التغيير
ولما ققولهم غزه
يقوم واحد منادينى
يقول ثانيه حتبقى دمار
د فى فكره وكمان فكره
وكمان فكره ققوم كنه
فى تخشيبه من الأفكار
أنا الخاينة بقولها لك
بعلو الصوت وببصمها
مداد إسود على إقرار
أنا منفعش أصون عرضك
وانتى باختصار صالحه
وانا فاجره من الفجار
أنا منفعش اكون أمك
ولا حضنى يطول حضنك
وانا كافره من الكفار
أنا ال رميت هوا ريقى
وأرض شفايفك الناشفه
جنين محتار
لا عارف يدخل الدنيا
ولا يرجع لبيت أمه
ومتعلق بحبل مرار
أنا الخاينه على البحرى
وبرسمها على شعرى
حروف خاينه مليها العار
دنا أمك وبكتبلك تسمحينى؟
ومين غيرك يسامحنى
يا أرض منبته أحرار؟
أنا أمك وبكتبلك
تسمحى ولا ما تسمحى
نهيت قولى وخت قرار
من الصبحيه ياغزه
وحوش بايعه سيول جاريه
على القبه وع الدوار
(وبعد م شيله من جدره)
(واخد لى بق من دمه)
وطهر بسطته بالنار
حصلى العصر ع المعبر
سليل العز والعزه
حبيب المجد والــــثوار
ورب الكعبه جيالك
- يا بنت الإيه -معبيه
هوى مصرى بلون تتار
ورب الكعبة جيالك
بجيش بلدى على كيفك
شيوخ تلقى وفيه بكار

ورب الكعبة جيالك
-يانور عمرى-
وساعتها مفيش حجه
مفيش إنكار
ققولك ياله سمحينى
تسمحينى
ومين غيرك فى ساعتها
يكون غفار؟


شعر /اسامه القهوجى