.
سؤال يوماتى
مشقلب حالى
هو احنا رايحين
على فين ؟
هو احنا صحيح
راح نتقدم
ولا يدوبك حلم
دافين؟
هو احنا صحيح
عملنا ثورة
ولا احنا بنلغبط
فى عجين؟
أسقطنا نظام
كان بيهرج
عيشنا فى يأس
طول السنين
وبعد النظام الجائر
فى نفس الفساد
أدينا عايشين
ايه اللى تغير
فى حياتنا
قولولى ايه
يابنى أدمين؟
الرشوه شغاله
على ودنه
والكوسه مده
وبيها ماشيين
وفى كل قطاع
حكومى ماشى
نفس الفساد
ونفس الروتين
وصاحبنا قاعد
على المكتب
بنفس التناكه
وبعنين زايغين
أقوله يابيه
أرجوك خلصنى
يقولى ماشى
واسطتك مين؟
أقوله يابيه
عملنا ثورة
يقولى تورة
ايه ياحزين
هو انت فاكرنا
راح نتغير
دا عشم ابليس
اللعين
الكوسه راح تكبر وترعرع
وتمد كمان فى غطان
تانيين
والموظف راح يبقى كدا
عبد الفساد وعبد
الروتين
التهريج فى كل حته
مستشرى فينا
وخليك فاكر وخلينا
فاكرين
فى البيوت وفى الشوارع
وفى كل حاره
عامل كمين
بعد الثوره
قولنا هنتصلح
ومفيش فايده
فى المواطنين
البلد اتملت أكشاك
على كل ناصيه
تلاقى كشكين
دا غير الباعه السريحه
وغير كمان
الجائلين
الفساد فينا لشوشته
وقولى بقى
الثوره فين
المواطن متغيرشى
عايز تصدق
وتشوف بعينك
روح اتفرج
على الطوابين
تلاقى ناس بتموت بعض
علشان رغيف أو
رغيفين
وصاحبنا صاحب الطابونه
بيبيع الدقيق قدام
العين
لاحد بيبلغ ولا حاجه
ويقولوا احنا
مالناش دعوه وكأنهم
مش شايفين
الفساد لساه للركب
وكلنا فيه
نايمين
هو احنا صحيح
عملنا ثورة
ولا احنا بنلغبط
فى عجين؟
سؤال يوماتى
مشقلب حالى
هو احنا رايحين
على فين؟
منقول