في موضوع شفته في احد المنتديات بصراحة الموضوع نفسو معجبنيش اوي بس الي عجبني ردود الاعضاء حبيت اوريها لكم عشان تعرفوا قيمة البلد دي برغم انو فيها عيوب زي اي بلد في العالم
ولكن بالرغم من عيوبها فاننا لانستطيع الابتعاد عنها او كرهها لانها ام الدنيا
الموضوع كان باسم"مصر ام الدنيا ليه"
وكانت العضوة بتنتقد الاوضاع السيئة الي في مصر وسالت هيا مصر ام الدنيا ليه؟
فكان رد الاعضاء كالاتي
الاول
كل مكان زى ما فيه الوحش فيه الكويس اللى يحببك فى المكان
والدنيا على كدة وكدة
هى اكيد ام الدنيا علشان فيها اهللك وحبيبك وجيرانك والعشرة
الطيبه
تقبلى رايى
الثاني
ياستي مصر ام الدنيا رضينا ام لم نرضى
ياحبيبة قلبي ده لاكلامك ولاكلامي ولاكلام حد
لما تعرفي انها ذكرت في القرءان اسما ومكانا؟؟تعرفي ليه ام الدنيا
_لما تعرفي ان مر بها سيدنا يوسف وسيدنا يعقوب وسيدنا موسى وسيدنا عيسى عليهم السلام جميعا؟؟تعرفي ليه ام الدنيا
_لما تعرفي ان الرسول صلى الله عليه وسلم استوصى باهل مصر خيرا؟؟تعرفي هي ليه ام الدنيا
_لما تعرفي ان الرسول صلى الله عليه وسلم اوصى اصحابه بجنود مصر وانهم
خير اجناد الارض وفي رباط الى يوم الدين؟؟تعرفي ليه هي ام الدنيا
_لما تعرفي ان مصر هي اللي كانت بتغذي العالم كله بالقمح في عهد الرومان والفينيقين؟؟تعرفي ليه هي ام الدنيا
_لما تشوفي الازهر على ارضها وهو بيعلم العالم كله؟؟تعرفي ليه ام الدنيا
_لما تعرفي ان كل علماء العالم بيشيدوا بعلماء مصر وابناءها؟؟تعرفي ليه ام الدنيا
_لما تعرفي ان مصر هي ملجأ كل تائه؟؟تعرفي ليه هي ام الدنيا
مالهاش ذنب مصر ان بعض ولاة الامر لايستحقوا ماهم فيه وانهم ذهبوا بها الى مالايحمد عقباه
اقولك على حاجة؟؟
لما تعرفي تخرجي من مصر وتعيشي بعيد عنها وتنسيها وتنسي انك مصرية؟؟ساعتها بس هاتعرفي يعني ايه ام الدنيا
الثالث
يا بنتى احنا لما بنقول مصر مش بنقصد حاكم وحكومه ومؤسسات بنقصد
الجدعنه وشهامه ولاد البلد والجار للجار
بنقصد لمه العيله ع الطبليه فول وبتنجان وطعميه
بنقصد رغيف العيش اللى مش عاجبك وهو سخن بحته جبنه بيضا طريه
بنقصد حكاوى الستات فى الاسواق والشبابيك والبلكونات
ولما يكون فى فرح فى بيت ماتعرفيش الفرح فى اى شقه كل البيبان مفتحه
لما يكون فى ميت ولا زغروده ترن فى بيت عريس و عروسه مراعاه لشعور الجار
بنقصد الام المحنيه على خدمه ولادها لا عندها فلبينيه ولا سريلانكيه
بنقصد الاب المصرى الشقيان التعبان اللى بياكل البصاره بعد يوم شقا طويل
ويقربع الميه من القله المنديه السقعانه وينبسط ويضحك ويقول لك اما حته اكله تسلم ايدك يا ام العيال
بنقصد دوشه العيال وشقاوتهم فى الشوارع وهم بيعلقوا زينه رمضان
بنقصد عربيه الفول وبتاع العرقسوس وبتاع الترمس وعربيه الحلبسه على الكورنيش فى اسكندريه
ياااااااااااااااااااااااااااه ياما انتى حلوه اوى يا مصر
الرابع
اكيد هتعرفي لما تسيبيها وتروحي احلي بلد في الدنيا وتاخدي جنسيتها
وبردو ترجعي تحني تاني لام الدنيا
وتدوري علي خرم ابدة فيها يكون ملكك عشان تحسي بالامان
حتي لو مش هتعيشي فيه وترجعي تاني لغربتك
وطول عمرك تقولي مصر ام الدنيا ..!!
الخامس
مصر ام الدنيا وهاتفضل بإذن الله ام الدنيا
سبق واوضحت ان بلدنا مش ذنبها سوء بعض ولاة الامر
ومش معنى كده انها وحشة
لا والف لا
بلدنا بخير في ذاتها حتى لو مش حاسينها
بلدنا خير بخيرها حتى لو مش شايفينه
بلدنا خير بناسها حتى لو كتر وحشهم
بلدنا مكرمة ومذكورة في القرءان
حبايبي حتى لو مصر فيها عيوب الدنيا
يكفيني انها مصر
ادخلوا مصر ان شاء الله امنين
مهما حصل بلد امن
ومهما كانوا فيها سيئين فهي بلد امن
واخيرا احب اقول اني بعشق البلد دي وبمووووووت فيها يا ام الدنيا للابد
يا حبيبتي يا مصر
موضوع: حبيبتي وحياتي و حبها بيجري جوا دمي 
الخميس 10 ديسمبر 2009 - 21:56
